Германиялик оила йўқолган мушугини топиш учун 22 минг доллар сарфлади

Германиялик эр-хотин — Рафал ва Моника Клайншмитлар учун мушуклар фақат уй ҳайвони эмас, балки оила аъзоси ҳисобланади. Шу боис улар ўзларининг Неро лақабли мушугини топиш учун қарийб бир йилдан бери изланиш олиб боришмоқда. Бу жараёнда эса жами 22 минг доллардан ортиқ маблағ сарфлашгани ҳақида The Times нашри хабар берди.

Неро 2024 йилнинг июлида, Клайншмитлар таътилга отланиш арафасида, кутилмаганда ғойиб бўлган. Рафалнинг сўзларига кўра, улар Мониканинг реабилитация дастури учун Кимгауга йўл олишган ва ўзлари Эрлангендаги меҳмонхонада тўхтаган. Аммо айнан шу ерда, Неро транспорт қутисидан сакраб чиқиб, қочиб кетган ва шу пайтдан бери ундан дарак йўқ.

Бу йўқотиш эр-хотин учун оддий ҳайвоннинг ғойиб бўлиши эмас, балки яқин дўстларини йўқотиш каби оғриқли туйғу билан боғланган. Шу сабабдан улар ҳар ҳафтанинг охирида 450 километр йўл босиб, мушукни излаш ишларини давом эттирмоқда. Шаҳарнинг турли жойларига Неронинг суратлари туширилган плакатлар илинган, машҳур тунец балиғи билан мушукни жалб қилишга уринишган, ҳатто махсус камералар ҳам ўрнатишган.

Клайншмитлар бу жараёнда нафақат вақт, балки молиявий жиҳатдан ҳам жуда катта ресурс сарфлашган. Бензин, меҳмонхона, тунец, камералар, босма харажатлари – барчаси жами 22 минг долларга яқин маблағни ташкил этган. Лекин уларни тўхтатадиган ҳеч нима йўқ. «У мен учун оддий мушук эмас, оиламиз аъзоси. Ва сен ҳеч қачон дўстингни ташлаб кетмайсан. Мен ҳали ҳам унинг тириклигига ишонаман», — дейди Рафал.

Яхши томони шундаки, Неро чипланган. Агар бирор кимса унга дуч келса, чип орқали унинг эгаларига хабар бериш имкони бор. Клайншмитлар шу умид билан яшаяпти.

Бу воқеа нафақат мушукларга муҳаббат қандай чуқур бўлиши мумкинлигини, балки садоқат ва оилавий бағрикенглик инсонни қандай фидокор қилиб қўйишини кўрсатиб турибди. Балки айнан шундай муҳаббат туфайли, бир кун келиб Неро ўз уйига қайтар…